Papierigs
De Afang hät es Tegschtprogramm namens SmartWare II gmacht. Dademit hani eifachi Flugbletter hergschtellt. Aber scho nach wenige Umwäg isch InDesign in Zämearbet mit Photoshop und Illustrator de klari Siger worde und ich ha die Wärchzüg in- und uswändig känegleert. Dademit hani vili schöni Büecher, Zitschrifte und anderi Drucksache hergschtellt – vode Idee bis zur druckfertige Datei.
Digitals
Sit öppe 35 Jahr machi ales, was mit Computer ztue hät. Agfange hät's miteme lahmgleite Netzwerk ime Reisebüro. Das hättmi zwar nöd so toll usgse la, aber ich ha vil gleert, wieni mit dene Compis umga mues. DOS, Windows 3.1 bis 11 mit verschidenschte Softwär, Sörfer und au Chligrät aller Art wie Telifon, Überwachigskameras oder sogar de fantastischi Psion sind im Lauf vode Zit vo mir inschtaliert oder unterhalte worde.
Spöter bini intensiv id Macwält itaucht. OS 8.5 isch de Start gsi, ali spötere OS, OSX und Mac OS sind nadisna duregschaffet worde und au de Mac Sörfer hät nöt gfählt.
En psundere Bereich sind Netzwerk, Telefonzentrale und Überwachigsalage für Hotels oder Bauunternemä.
Zahlezügs
Scho als Bueb hani ales zelt oder usgrächnet. Das hät sich spöter i Buechhaltige aller Art usgwitet. Sidhär wird öbbenes Dutzend Firmene vo mir betreut. Excel-Zaubereie und Finanzberatig oder Stüre laufed näbeher.
Persönlichs
Ich bin nonig pensioniert, han e wunderbari Frau, foif Chind und zwei Änkeli, womi zimli im Trab haltet. Ufgwachse bini ide Nöchi vo Züri, wohne aber nacheme längere Umwäg über sToggeburg sit bald 30 Jahr zBasel. Ich fahre lideschaftlich gärn Töff und bi oft mit minere 12er-GS irgendwo zFrankrich oder an andere schöne Ort unterwägs.